2 nilikida dahil sa onsehan

BATAAN, Philippines – Pinaniniwalaang onsehan sa droga ang isa sa motibo kaya pinabulagta ang magkaibigang lalaki matapos itong ratratin ng riding-in-tandem assassins  sa kahabaan ng Roman Superhighway sa Barangay Daang Pare, bayan ng Orion, Bataan kamakalawa ng tanghali. Kinilala ng pulisya ang dalawa na sina Mhel Yolas at Alexander Gevega na kapwa nakatira sa Barangay Alangan sa nasabing bayan. Ayon kay P/Insp. Je­niffer Cruz, provincial PNP information officer, magkaangkas sa motorsiklo sina Yolas at Gevega patungong bayan ng Mariveles mula sa Balanga City nang sundan at pagbabarilin ng mga di-kilalang lalaki na sakay din ng motorsiklo. Narekober sa crime scene ang mga basyo ng bala ang cal. 45 pistol at motorsiklo ng mga biktima habang sinisilip ng pulisya ang anggulong onsehan sa bentahan ng droga ang motibo.