4 minasaker sa alitan sa lupa
MANILA, Philippines – Kalunus-lunos na kamatayan ang sinapit ng apat-katao makaraang igapos, pagsasaksakin at pagtatagain ng mga di-kilalang kalalakihan sa naganap na masaker sa bayan ng Nabunturan, Compostela Valley kamakalawa.
Kinilala ang mga biktima na sina Ramil Quilaton, 31; Ruel Quilaton, 36; Romil Diongson, 13; at John Mark Diongson,19, pawang nakatira sa Purok 9, Barangay Poblacion sa nabanggit na bayan.
Sa ulat ng Compostela Valley PNP na isinumite sa Camp Crame, ang bangkay ng mga biktima ay natagpuan sa may pampang ng ilog sa Purok 3, Barangay Basak sa nasabing bayan.
Ang apat ay pawang nakagapos ang mga kamay at pawang tadtad ng mga saksak saka taga sa iba’t-ibang bahagi ng katawan kung saan tinakpan pa ng face towel at t-shirt ang ulo ng mga biktima.
Pinaniniwalaan namang may kinalaman sa alitan sa lupa ang pamamaslang sa mga biktima matapos bantaan ng kanilang mga kaaway.
Kaugnay nito, naghahanap na ng testigo ang mga awtoridad upang maresolba ang krimen.
Patuloy naman ang pagsigaw ng hustisya ng pamilya ng mga biktima.
- Latest