Dispatcher ng bus, itinumba

NORTH COTABATO, Philippines - - Pinaniniwalaang personal na galit sa paradahan ng sasakyan ang isa sa motibo kaya pinagbabaril hanggang sa napatay ang 40-anyos na dispatcher ng bus sa terminal sa panulukan Quezon Avenue at Don Rufino Alonzo Street sa Cotabato City, Maguindanao kahapon ng umaga. Napuruhan sa ulo ang biktimang si Jimmy Abas ng Rosary Heights 1 sa nasabing lungsod. Lumilitaw sa inisyal na pagsisiyasat ng pulisya, nasa terminal ng bus si Abas nang lapitan at ratratin  ng dalawang lalaking sakay ng motorsiklo. Nagtamo ng tama ng bala sa ulo si Abas at tatlong iba pang tama sa iba’t ibang bahagi ng katawan. Narekober sa crime scene ang apat nabasyo ng cal.45 pistol habang patuloy naman ang imbestigasyon.