Pugante patay sa shootout, 3 pa timbog!

BULACAN , Philippines  - Natapos ang mahabang pagtatago ng isang lalaki habang tatlo pang kasamahan nito ang napilitang sumuko matapos na makipagpalitan ng putok sa mga umaarestong pulis sa Brgy. Minuyan,San Jose Del Monte City, Bulacan kahapon ng madaling-araw.

Nasawi sa pinangyarihan ng shootout ang puganteng si Russel Arceo, 31, ng Brgy. Sto.Domingo 2, Capas, Tarlac habang nasa kostodiya na ng pulisya ang tatlo pang suspek na sina Ar Jhay De Belen, 18, ng Brgy. Bantog, Muñoz City, Nueva Ecija; Tristan Huit, 32, ng Brgy. Minuyan 2 at Jose Paulo Maesa, 23, ng Brgy. Minuyan 4, pawang sa San Jose Del Monte City.

Base sa ulat ni P/Supt. Joel Estaris, dakong alas-4:30 ng madaling-araw ay nagsagawa sila ng operasyon kasama ang mga kagawad ng Bureau of Jail Management sa isang bahay sa Road 1, Brgy. Minuyan 2 matapos na makumpirma ang presensya ng mga suspek na may nakabimbing kaso.

Habang papalapit ang mga pulis sa itinurong bahay, natunugan ito ng mga suspek na naging dahilan upang barilin ang mga awtoridad kaya napilitan silang gumanti na naging dahilan ng kamatayan ni Arceo habang napilitang sumuko ang tatlo .

Narekober sa safehouse ang dalawang .38 revolber na baril, apat na cell pone, apat na sachet ng shabu at marijuana, mga drug paraphenalias, camcorder, laptop at motorsiklong Honda TMX (9039-TX).