Ina kritikal sa ligaw na bala

KAMPO SIMEON OLA, Legazpi City – Sinalo ng isang biyudang ginang ang bala para sa kaniyang anak nang barilin ng kaaway nito kamakalawa ng gabi sa Brgy. Ilaya, Balud, Masbate.

Nakikipagbuno ngayon kay kamatayan sa Balud Municipal Hospital ang biktimang si Luzviminda Dalinog, 56, biyuda at residente ng naturang lugar.

Agad namang nasakote ng mga awtoridad ang suspek na si Charlie Rosete, 40, may asawa at residente ng naturang lugar.

Batay sa ulat ng pulisya, ang insidente ay naganap dakong alas- 7 ng gabi habang ang biktima at anak nito ay nagkukuwentuhan sa labas ng kanilang bahay.

Bigla na lamang umanong sumulpot sa lugar ang suspek na armado ng shotgun na ipinuntirya ng putok sa anak subali’t mabilis itong sinangga ng kaniyang ina.

Kasalukuyan na ngayong nakakulong sa Balud Municipal Police Station (MPS) ang suspek. (Ed Casulla)