Rider inutas ng sinigawan at minurang pedestrian
MANILA, Philippines — Mistulang nakahanap na katapat ang isang motorcycle rider nang ataduhin ng saksak ng isang pedestrian na kanyang sinigawan at minura, naganap kamakalawa sa Brgy. Maligaya, Buenavista, Quezon.
Ang biktima na nagtamo ng isang malalim na saksak sa kaliwang bahagi ng tiyan na kanyang ikinasawi ay kinilalang si Domingo San Pedro, 50, magsasaka ng Barangay San Roque habang nakapiit na sa municipal jail ang sumukong suspek na si alyas Jerry, 58, residente ng Barangay Maligaya.
Ayon sa pulisya, alas-3:30 ng hapon ay minamaneho ng biktima ang isang motorsiklo at binabagtas ang barangay road.
Sinigawan at minura umano nito ang suspek na naglalakad lamang sa gilid ng kalye kung kaya’t sa inis ng huli ay hinabol nito ang biktima at nang abutan ay inundayan ng saksak sa tiyan ng hawak na gulok.
Makaraan ang insidente ay sumuko sa barangay ang suspek na nahaharap sa homicide.
- Latest