SRP sa bigas, planong ipatupad ng DA
MANILA, Philippines — Upang matiyak na makakakain ang lahat ng sambayanang Pilipino ng bigas na may abot kayang presyo, plano na ng Department of Agriculture (DA) na magpatupad ng suggested retail price (SRP) sa bigas.
Ayon kay Agriculture Asst. Secretary at spokesman Arnel de Mesa, upang maipatupad ang nasabing hakbang ay kailangan muna nilang kumonsulta sa lahat ng mga stakeholders mula sa consumer groups, producer groups at sa traders at millers upang maitakda ang SRP.
Ang pahayag ay ginawa ng DA nang ianunsyo ng Philippine Statistics Authority (PSA) na may pagtaas sa presyo ng bigas ng 22.9 percent noong Disyembre 2023, ang pinakamabilis na pagsirit ng presyo nito sa nakalipas na 14 na taon.
“Kailangan nating tignan ‘yung composition sa producers group, paano na produce ‘yung palay hanggang sa maging bigas. And then, on the traders side, ano mga gastusin nila sa warehousing, sa milling, sa drying. Sa retailers naman, magkano ‘yung kanilang mga gastusin din po, at maikumpara, at sa ganoong paraan, makikita po ang magiging gains ng SRP,” pahayag ni De Mesa.
Noong Disyembre 2023, ang presyo ng well-milled rice kada kilo ay pumalo sa P53.82, mas mataas ito sa P51.99 per kilo noong Nobyembre 2023 o halos mataas ng P10 kung ikukumpara sa P43.98 kada kilo ng bigas noong Disyembres 2022.
- Latest
