Kuya tinodas ng utol

MANILA, Philippines – Humantong sa pagpatay ang pagtatalo ng isang magkapatid tungkol sa pinag-aawayang lupa nang barilin ng nakababatang kapatid ang kanyang kuya kahapon ng tanghali sa bayan ng Mlang, North Cotabato.

Ang biktima na namatay noon din dahil sa mga tama ng bala ng kalibre 45 sa katawan ay nakilalang si Thomas Buenaflor, 69.

Habang ang suspek na naaresto sa isang follow-up operation ay kinilalang si James Buenaflor, 66.

Batay sa ulat, bago nangyari ang krimen dakong alas-12:25 ng tanghali ay kakauwi lang ng magkapatid sa kanilang bahay sa Purok Sentro, Barangay New Rizal, Mlang buhat paglilibing  nang namayapa nilang kapatid nang maganap ang pagtatalo tungkol sa lupa.

Sa gitna nang pagtatalo ay kinuha ng suspek ang kanyang baril at pinagbabaril ang kuya ng pitong beses sa katawan. Nakatakdang kasuhan ang suspek ng parricide at paglabag sa Comelec gun ban.