Pangulo ng TODA itinumba
MANILA, Philippines - Namatay noon din ang isang pangulo ng samahan ng tricycle at operator nang ito ay barilin sa likuran ng hindi pa nakikilalang suspek habang pasakay ng kanyang motorsiklo mula sa isang pagpupulong kamakalawa ng hapon sa Quezon City.
Ang nasawi ay kinilalang si Ernesto Guerrero, 59, pangulo ng United Federation Tricycle Operator Drivers Association (UFTODA), may-asawa at residente ng No. 69-Road 12, NDC Compound, Brgy. 628, Manila.
Batay sa imbestigasyon, bago nangyari ang krimen dakong alas-4:45 ng gabi sa tapat ng Manila Triwheel Regulatory Office Compound sa kahabaan ng A. Bonifacio Ave., Brgy. Paang Bundok ay kagagaling lamang ng biktima sa isang miting na ipinatawag nito sa kanyang mga miyembro.
Papasakay na siya sa kanyang kulay asul na motorsiklo (N0-14978) nang biglang sumulpot ang suspek at barilin sa likuran.
Mabilis namang tumakas ang suspek sakay ng isang kulay berdeng tricycle na walang plaka.- Ricky Tulipat-
- Latest
