10 lugar signal 2 kay ‘Chedeng’
MANILA, Philippines - Bahagyang bumilis ang Bagyong Chedeng habang papalapit sa bahagi ng Isabela, Aurora na nasa Signal # 3.
Batay sa weather bulletin ng PAGASA na inilabas alas-11:00 kahapon ng umaga, huling namataan ang bagyo sa layong 450 kilometro silangan timog-silangan ng Casiguran, Aurora.
Taglay pa rin ng bagyong Chedeng ang lakas ng hanging umaabot sa 130 kilometers per hour (kph) malapit sa gitna at pagbugsong aabot sa 160 kph.
Kumikilos ang bagyo pakanluran hilagang-kanluran sa bilis na 22 kph.
Dumami na ang mga lugar na nasa Signal # 2 tulad ng Isabela; Southern Cagayan; Kalinga; Mountain Province; Ifugao; Benguet; Nueva Vizcaya; Quirino; Aurora; at Catanduanes.
Nasa Signal #1 naman ang natitirang bahagi ng Cagayan kasama ang Babuyan Island; Apayao; Ilocos Norte; Ilocos Sur; Abra; La Union; Pangasinan; Nueva Ecija; Tarlac; Pampanga; Bulacan; Rizal; Quezon; Camarines Norte; at Camarines Sur.
Babala pa ng PAGASA, posible ang storm surge o biglaang pagtaas ng lebel ng tubig-dagat ng hanggang 2 metro sa eastern coast ng Aurora, Quezon at Isabela.
Kaya naman ay libu-libong residente sa mga mababang lugar na malalapit sa baybaying dagat at pampang ng mga ilog ang inilikas na kaugnay ng preemptive evacuation sa mga lugar na maapektuhan ng paghagupit ng bagyong Chedeng bilang bahagi ng precautionary measures ng pamahalaan kaugnay ng ipinag-utos na ‘zero casualty’ ni P-Noy kay Chedeng.
Nabatid na sa Baler, Aurora na tinutumbok ni Chedeng ay nasa 4,373 katao na ang inililikas na ng mga kinauukulang opisyal sa lalawigan.
Ang lalawigan ng Aurora ay isang popular na destinasyon ng mahihilig sa ‘surfing’ na ipinahinto muna gayon din ang pagswi-swimming ng mga turista at residente dito.
Linggo ng umaga, inaasahang magla-landfall si Chedeng sa Southern Isabela at lalabas ng Philippine Area of Responsibility (PAR) sa Lunes, Abril 6.
- Latest