Doktor pinagnakawan, pinatay sa van
MANILA, Philippines - Isang 54-anyos na doktor ang natagpuang patay kahapon ng umaga sa loob ng kanyang Starex van na nakaparada sa kahabaan ng Governors Drive, Brgy. Tanauan, Tanza, Cavite.
Ang biktima ay kinilalang si Rolando Custodio, residente ng Brgy. San Nicolas Bacoor City, Cavite. Nagtamo ang biktima ng isang tama ng bala sa ulo.
Batay sa ulat, dakong alas-8:00 ng umaga nang matagpuang patay ang biktima na nakapiring ang mga mata sa loob Starex van (WFF-535) na nakaparada sa lugar.
Sa inisyal na imbestigasyon ng pulisya na ang motibo ng pagpatay sa biktima ay pagnanakaw dahil sa nawawala ang mga pera, alahas at mga kagamitan nito sa loob ng van.
Narekober ng pulisya sa loob ng van ang 2 piraso ng empty shells ng cal 45 na siyang hinihinalang ginamit sa pagpatay ng mga suspek sa biktima.
Nabatid na ilang araw na hindi umuwi ng kanilang bahay ang biktima.
- Latest
