Faith healer na pumalpak sa gamutan,itinumba

MANILA, Philippines - Ang pagpalpak umano na paggamot ng isang faith healer ang naging dahilan ng kamatayan nito matapos na siya ay pagbabarilin kamakalawa ng gabi sa Brgy.Barubuhan, Sominot, Zamboanga del Sur.

Ang nasawing biktima ay kinilalang si Damaso Andales, 55, isang dinarayong faith healer na naninirahan sa Purok 2, Brgy. Barubuhan, Sominot ng lalawigan.

Sinabi ni Inspector Felixberto Briones, hepe ng Sominot Police, naganap ang pamamaslang sa biktima sa naturang lugar dakong alas-7:47 ng gabi.

Naganap ang insidente may 30 metro ang layo sa tahanan ni Trinidad Superales sa nasabing lugar kung saan kukunin sana ng biktima ang kaniyang jacket nang sumulpot ang salarin at harangin ito sa daan.

Bigla na lamang pinagbabaril ng salarin ang biktima na nasapul ng tama ng bala sa dibdib at iba pang bahagi ng katawan na siya nitong dagliang ikinasawi.

Nabatid na ang biktima ay marunong gumamot ng kulam at marunong rin umanong mangkulam na posibleng may nasagasaan at niresbakan ito.