Driver inutas habang namamasada

MANILA, Philippines - Utas ang isang tricycle driver makaraang pagbabarilin habang namamasada sa Taguig City, kahapon ng madaling araw.

Nasawi habang ginagamot sa Taguig-Pateros District Hospital ang biktimang si Mark Anthony Villena, 28-anyos, naninirahan sa Brgy. Napindan, ng naturang lungsod.

Sa ulat, namamasada ng tricyle ang biktima dakong alas-3:15 ng mada­ling-araw sa kahabaan ng C-6 Road sa may Purok 6 Brgy. Napindan nang pagbabarilin ng hindi pa nakikilalang salarin.

Ayon sa vendor na si Marcelo Paningbatan, nag-aayos siya ng kanyang paninda sa Talipapa sa lugar nang dumaan sa harapan niya ang biktima na duguan at sakay pa ng kanyang tricycle habang humihingi ng saklolo.

Nagmagandang-loob naman si Paningbatan at isinugod ang biktima sa pagamutan kung saan nasawi ito dakong alas-4:00 ng umaga dahil sa tama ng bala buhat sa hindi pa mabatid na kalibre ng baril sa ulo.