Pinagtataga ng jungle bolo… engineer inutas sa barko
MANILA, Philippines - Pinagtataga ng jungle bolo hanggang sa mapatay ang isang chief engineer ng suspek na quarter master habang naglalayag ang sinasakyan nilang barko sa Manila Harbour Center, North Harbor, Tondo, Maynila, kamakalawa ng gabi.
Kinilala ni P/Sr., Insp. Joey de Ocampo, hepe ng Manila Police District-Homicide Section ang biktimang si Engr. Rio Billones, 34, residente ng Juan Luna corner M. Industria Sts., Tondo.
Agad naman nadakip ang suspek na quarter master na si Julito Sibongga, 40, nakatira sa Kasahan St., Batasan Hills Quezon City.
Sa ulat ni SPO3 Rodelio Lingcong, nabatid na ang insidente ay naganap dakong alas-8:45 ng gabi sa loob ng tugboat na M/T Nicole.
Sa salaysay ni Eliseo Sacedor, 46, stay-in captain ng Coastline Integrated Services Corporation, siya ang nagpapatakbo ng tugboat patungo sa Delpan nang marinig niya ang pag-aaway nina Billones at Sibongga.
Sinabi ni Sacedor, narinig niyang nagsisigawan ang dalawa hanggang kumuha ng jungle bolo ang suspek at pinagtataga ang biktima.
Matapos ang insidente ay nagtangka pa umanong tumakas ang suspek sa pamamagitan ng pagtalon sa dagat pero mabilis siyang dinamba at inaresto ng operation officer ng barko na si Dominador Torres.
Nananatiling tikom ang bibig ng suspek at ayaw niyang sabihin ang dahilan ng pag-aaway nila ng biktima.
Sa ngayon ay nakapiit na sa MPD-Homicide Section detention cell si Sibongga at nahaharap sa kasong murder.
- Latest
