Silver, bronze tiyak na sa Team Philippines

MANILA, Philippines — Isang silver at isang bronze medal ang tiyak nang makukuha ng Team Philippines matapos ang mga panalo nina boxer Carlo Paalam at tennis sensation Alex Eala sa 20th Asian Games kahapon sa Aichi-Nagoya, Japan.

Tinalo ni Paalam, sumuntok ng silver sa 2020 Tokyo Olympics, si Makhmud Sabyrkhan ng Kazakhstan, 3-2,  para uma­bante sa finals ng men’s 55-kilogram division ng boxing event.

Lalabanan ng 28-anyos na tubong Talakag, Bukidnon sa gold medal round si Japanese Rui Yamaguchi bukas.

Sumampang muli si Paalam sa Asiad finals matapos kumuha ng bronze sa 2018 edition sa Palembang, Indonesia.

Sa lawn tennis, dinispatsa ni Eala si Joanna Garland ng Chinese Taipei, 7-5, 6-0, papasok sa semifinals para makatiyak ng bronze sa women’s singles event.

Haharapin ng 21-anyos na Pinay tennis sensation si Wang Xiyu ng China sa semifinals para sa tiket sa gold medal round.

Ang mga medalya nina Paalam at Eala ang inaasahang daragdag sa tatlong golds, tatlong silvers at 12 bronzes ng Team Philippines para sa No. 17 spot sa Aichi-Nagoya Asiad na dinodomina ng China bitbit ang 145 golds, 63 silvers at 53 bronzes kasunod ang host Japan (45-72-69) at Korea (24-28-45), Uzbekistan (14-17-16) at Thailand (12-10-12).

Sa wrestling, minalas si Callum Johnson Roberts sa tansong medalya matapos ang 0-9 pagyukod kay Kumar Sunil ng India sa men’s Greco Roman -87kg.

Sa women’s beach volleyball, lusot sa semis sina Sofiah Pagara at Khy Progella matapos talunin sina Japanese duo Ren at Non Matsumoto, 24-22, 22-20.

Ligwak sa quarterfinals sina Sisi Rondina at Bernadeth Pons laban kina Taravadee Naraphornrapat at Worapeerachayakorn Kongphopsarutawadee ng Thailand, 17-21, 21-12, 13-15.

Ang Thai tandem ang lalabanan nina Pagara at Progella para sa finals berth ngayong umaga.

Sa indoor volleyball, sasagupain ng Alas Pilipinas Men ang Indonesia ngayong alas-6 ng gabi sa classification round para sa 9th hanggang 16 place matapos matalo sa Korea, China at Chinese Taipei sa Pool D sa group stage.