Triathletes bumida sa ratsada ng Pinas

MANILA, Philippines — Umarangkada ang Team Philippines tatlong araw bago ang pagtatapos ng 33rd Southeast Asian Games kahapon sa Thailand.

Winalis ng mga triathletes ang tatlong gold medals, habang nag-ambag ng dalawa ang mga muay thai fighters at tig-isa mula sa windsurfing at e-sports sa pag-angat ng delegasyon sa overall medal standings.

Bumandera sina Kira Ellis, Raven Faith Alcoseba at Kim Mangrobang sa women’s relay event ng triathlon at nanguna sina Inaki Emil Lorbes, Fernando Jose Casares at Matthew Justine Hermosa sa men’s relay.

Nagdagdag pa ng ginto sina Ellis, Casares, Alcoseba at Andrew Kim Remolino sa mixed team relay para kumpletuhin ang ‘sweep’ ng Pinas sa triathlon.

Sa muay thai, dalawang ginto ang pinatumba nina Islay Erika Bomogao (women’s muay combat 45kg) at LJ Rafael Yasay (men’s muay combat 51kg).

Wagi naman ng gold ang SIBOL Men matapos walisin ang Team Malaysia, 4-0, sa finals para sa ikaapat na sunod na MLBB title.

Sa windsurfing, panalo ng ginto si Dhenver John Castillo sa Men’s U19 IQ Foil at nagdagdag sina Angelo Amboy (Techno 293 Plus Men) at Angela Paz at Harold Madrigal (Women’s and Men’s IQ Foil) ng pilak at tanso, ayon sa pagkakasunod.

Mayroon ngayong 37 golds, 51 silvers at 118 bronzes ang Team Philippines para sa fifth place, habang itinanghal nang overall champion ang Thailand sa nahakot na 182 golds, 116 silvers at 76 bronzes.

May silver sina rower Joanie Delgaco (women’s single sculls), fencer Noelito Jose Jr. (men’s individual sabre), muay thai warrior Tyron Jamborillo (men’s muay combat 45kg), shooter Hagen Alexander Topacio (men’s shotgun-trap) at pentathlete Princess Honey Arbilon (modern women’s laser run).

Sa boxing, swak sa finals sina Olympic bronze medalist Emir Felix Marcial (men’s 80kg) at Olympian Aira Villegas (women’s 50kg) para sa tsansa sa gold medal.