Flying Titans sumabit sa liderato
MANILA, Philippines — Kagaya ng PLDT Home Fibr, muli ring sumosyo ang Choco Mucho sa nagdedepensang Creamline sa liderato ng 2024 PVL All-Filipino Conference.
Giniba ng Flying Titans ang Galeries Tower Highrisers, 25-13, 25-19, 25-17, sa likod nina Sisi Rondina at Chery Nunag kahapon sa Philsports Arena sa Pasig City.
Nagposte si Rondina ng 16 points galing sa 13 attacks, dalawang service ace at isang block para sa 6-1 kartada ng Choco Mucho kapareho ng Creamline at PLDT.
“Sobrang thankful ako kasi lahat ng ipinasok kong player nag-deliver. Siyempre, si Deanna (Wong) rin nakuha na iyong rhythm niya sa paglalaro,” sabi ni coach Dante Alinsunurin na nakakuha kay Wong ng pitong excellent sets.
May 12 markers si Nunag mula sa pitong attacks, dalawang blocks at tatlong aces para pigilan ang asam na ikatlong dikit na ratsada ng Galeries na nahulog sa 2-5.
Samantala, hinataw ng PLDT Home Fibr ang ikaapat na dikit na panalo matapos walisin ang Akari, 25-17, 25-20, 25-19.
Umiskor si Majoy Baron ng 13 points mula sa walong attacks, dalawang blocks at tatlong aces para sa 6-1 marka ng High Speed Hitters habang may 11 markers si Fil-Canadian Savi Davison bukod sa team-high 11 receptions.
Laglag ang baraha ng Chargers sa 2-5 na hindi nakuha ang serbisyo ni Ced Domingo dahil sa right knee injury nito.
- Latest
