NBA Season 101

Huwag malilito, kung dati-rati ay sanay tayong isang buong NBA calendar na isang regular season lang ang sinusubaybayan  natin bukod sa mga pre-season games na mga exhibition matches lang at All-Star Game, nagbago na ang lahat mula noong nagkaroon ng COVID-19 pandemic.

Iba na ngayon.

Pagkatapos ng pre-season, naglaro ng unang bahagi ng regular season games tapos nagkaroon ng In-Season tournament kung saan nakopo ng LA Lakers ang NBA Cup.

Ginananap ang All-Star Week bago itinuloy uli ang mga regular season games na matatapos sa April 14 at lalaruin ang NBA Play-In Tournament sa April 16-19.

Huwag malilito.

Ang NBA Play-In Tournament ay walong extra games lamang sa NBA calendar.

Parang mini-tournament lang kung saan may apat na teams, ang No. 7-10 teams sa bawat conference, pagkatapos ng regular season, na maglalaban-laban para sa final two spots ng kani-kanilang respective conference playoffs.

Sibakan tournament kumbaga.

Maglalaban ang No. 7 at No. 8 teams kung saan  ang mananalo ang ookupa ng No. 7 seed sa playoffs. Pero ang losing team ay may tsansa pa.

Maglalaban naman ang No. 9 at No. 10 team  para sa karapatang harapin ang talunan sa No. 7-No. 8 match kung saan nakataya ang ika-walo at huling play-off slot.

Kumbaga, ang No. 7 teams at 8 teams ay may twice-to-beat advantage kontra sa No. 9 at No. 10 teams.

Pagkatapos niyan, lalaruin na ang playoffs para malaman kung sino ang maglalaban sa NBA finals para sa Larry O’Brien championship trophy.

Sa ngayon ang Boston Celtics pa lang ang nakaka­siguro ng playoff slot sa East at inaasahang sunud-sunod nang mapupuno ang Top-six slots sa bawat tournament.