Balik sa San Lazaro ang karera ngayon

MANILA, Philippines — Balik sa San Lazaro Leisure Park sa Carmona, Cavite ang karera kung saan may siyam na balanseng race masisilayan ng mga karerista.

Matapos ang 3rd place finish ng Wonderland sa 2020 Presidential Gold Cup championship ay muli itong sasalang sa pista ngayong araw.

Sasakyan ni former Philippine Sportswriters Association, (PSA) Jockey-of-the-Year awardee Patty Dilema, mapapalaban ang Wonderland sa matinik na Righteous Ruby sa Condition Race Merge (10).

Patok sa karera tipsters ng programa ang Righteous Ruby na sasakyan ni class A rider MM Gonzales kaya inaasahang mahihirapan ang Wonderland na makuha ang panalo lalo na’t kasali rin sa nasabing event ang Our Tito at Chancetheracer.

May distansyang 1,500 meter race, ang ibang kalahok ay ang Forest Cover, The Accountant, Best Regards, Jayz, Gomper Girl, Eugene Onegin at Magtotobetsky.

Ang nasabing event ay suportado ng Philippine Racing Commission, (PHILRACOM).

Samantala, tumalo kay Woderland sa Presidential Gold Cup ay ang Pangalusian Island.