Blue Eagles lumapit sa outright finals

MANILA, Philippines — Dumiretso ang Ate­neo De Manila Universi­ty sa pang-13 sunod na rat­sada matapos idiskaril ang Na­tional Universi­ty, 88-51, sa Season 82 UAAP men’s basketball tournament kahapon sa Yna­res Center sa Antipo­lo City.

Umariba sa opensa ng Blue Eagles si import Ange kouame na nagtala ng 17 points, 13 rebounds, 3 assists at 3 blocks at nag­tala si Thirdy Rave­na ng 15 markers, 4 boards, 3 assists at 1 steal.

Umangat ang baraha ng Ateneo sa 13-0 para ma­kalapit sa pagwalis sa eliminations patungo sa out­right Finals ticket.

Maagang kinuha ng Blue Eagles 22-12 abante sa first quarter patungo sa paglilista ng 35-point lead, 76-41, mula sa three-point play ni SJ Be­langel  sa huling 6:50 mi­nuto ng final period.

“I think for 2 weeks in a row, we’ve come out with a great attitude. And it’s been reflected in the way they play, pace of the game, the defensive in­tensity, the rebounding, these are the things that make coaches proud.” sa­bi ni coach Tab Baldwin.

Walang nagawa ang 21 markes at 4 rebounds ni Shaun Ildefenso para sa Bulldogs.

Naging maalat ang opensa ni Dave Ildefonso matapos mairehsi­tro ang career-low na 2 points sa 2-11 baraha ng NU.

Sa ikalawang laro, si­nagpang naman ng University of Santo Tomas ang Adamson Universi­ty, 80-74, para isara ang eliminasyon bitbit ang 8-6 record.

Inangkin ng Growling Tigers ang playoff para sa isang semifinals berth.

Mula sa 55-65 pagka­kabaon ay naitabla ng Fal­cons ang laro sa 67-67 sa fourth period.

Ngunit nagsalpak sina Mark Nonoy at Sherwin Concepcion ng tig-isang tri­ple na sinundan ng tres ni Renzo Subido para mu­ling ilayo ang UST sa 76-69 sa huling 1:36 minuto ng laro at tiyakin ang ka­nilang panalo.