Gaganap na Big Bert, Little Jon at Mark ng Voltes V: Legacy, ipinakilala!

Inanunsyo na ang tatlo sa mga gaganap na miyembro ng Team V5 na sina Big Bert Armstrong, Little Jon Armstrong, at Mark Gordon ng live-action adaptation ng Japanese anime series na Voltes V: Legacy ng GMA Network nitong Lunes (Pebrero 8).

Napiling gumanap na Little Jon ang Kapuso actor na si Rafael Landicho, ang StarStruck Season 7 alumnus naman na si Radson Flores ang gaganap na Mark, habang si Matt Lozano naman ang nagwagi mula sa auditionees para sa karakter ni Big Bert.

Ikinuwento ni Radson na dama niya ang kaba at excitement sa kanyang first big role at puspusan na rin ang kanyang pagte-training para sa karakter ni Mark.

May pagkakatulad naman daw ang singer-actor at Spogify 2016 winner na si Matt kay Big Bert, “Si Big Bert kasi masayahing tao pero at the back of his mind nandoon ‘yung lungkot.”

Ang pinakabatang miyembro naman ng Team V5 na si Rafael ay excited na rin gampanan ang kanyang role bilang ang genius na si Little Jon, “Hindi po ako makapaniwala na nakuha po ako bilang isa sa mga gaganap sa Voltes V.”