Princess of the World 2019: Maulawon hangtud misidlak

CEBU, Philippines — Ang pagsalmot sa indigay ni Jashley Murro Van Hemelen maingon nga nakatabang kini sa pagpaulambo sa iyang kompyansa sa kaugalingon, ug makat-on sa pakighugoyhugoy sa kadaghanan.

Gani nahimo siya nga biktima sa pagtamay kaniadto apan ang tanan, iyaha gyud nga nalampusan

“Being shy, it kind of affects me at school. I was scared that everyone would laugh at me for making a mistake. I want to at least show them that I can do more than just being the shy girl,” saysay pa ni Filipina-Belgian beauty queen.

Dili lalim ang nahiaguman sa 13 anyos nga si Jashley niadtong nagtungha nga walay suod nga higala sa klase.

Apan wala kini nahimong babag aron nga dili mausab ang dagan sa iyang kinabuhi.

Gumikan sa iyang katahum ug sa gasa sa gitas-on, misalmot siya sa labing una niya nga indigay sa kauluhan ug nahimo siya nga mobandera sa atong nasud alang sa Prince and Princess of the World 2019.

Wala gyud niya pakyasa ang maong higayon mao nga gumikan sa iyang abilidad, siya ang nahimong Princess of the World Super Grand Prize winner didto sa Albena Resort Varna, Bulgaria sa imaging bulan.

Pipila ka semana pa lang ang milabay human sa koronasyon, nakig-atubang na dayon si Jashley sa  Cebu Entertainment Group, (E-Group), gumikan kay mapasalamaton siya niini sa dakong suporta nga iyang nadawat sa wala pa siya nilarga sa Bulgaria.

Sama sa uban, duna pud siya’y mga  sakit nga kaagi sa kinabuhi nga anaa pa hangtud karon sa iyang panumduman.

Giasoy niya nga biktima siya sa bullying gikan sa iyang mga kauban sa eskuylahan kaniadto.

Ang mga sungog nga nadawat ni Jashley ang usa sa mga tinubdan nganong hilumon siya nga pagkatawo.

Matud pa niya nga sa matag higayon nga sungugon siya, dili na siya motubay aron nga dili na magkagubot.

Mas pillion pa niya nga moadto siya sa iyang inahan ug i-comfort siya niini.

Dili niya malimtan ang nahitabo niya kaniadto diin gisukmag siya bukton sa iyang classmate. Mao na kini ang higayon nga dali nga miresponde ang iyang inahan nga si Mommy Judy. Mibalhin si Jashley sa laing tunghaan ug didto na siya mipadayon sa iyang edukasyon sa Singapore School Cebu. Karong ting-abli sa klase, usa na siya ka tinun-an sa Grade 8.

Lahi na gyud ang dagan sa pagka-estudyante ni Jashley gumikan kay nakabaton na siya og mga higala diin mao kini ang mga misuporta kaniya sa iyang pagka-beauty queen.

Mapasalamaton kaayo si Jashley sa iyang pamilya nga mao gyud ang iyang sandigan.

Bata pa lang si Jashley, nagsugod na siya sa pagrampa. Nahimo siya nga kabahin sa gipahigayon nga ‘SELFi’ modelling workshop nga gipangulohan sa kanhi ‘Mag TV’ host sa ABS-CBN Cebu nga si Blinky de Leon.

Pipila ka tuig ang milabay, nagkahimamat sila sa respetado nga fashion designer dinhi sa Sugbo nga si Danny Booc kinsa pangulo sa OZAR Models Philippines.

Si Danny mao ang nakauban ni Jashley sa Bulgaria gawas kang Mommy Judy.

Maingon gyud ni Danny nga si Jashley mao ang perfect example sa panultihon nga: “Models and beauty queens are not born. They are made”.

Matud pa ni Danny nga si Jashley mao ang model nga kanunay niya nga tudluan apan dili gyud kini mohatag og reaksyon apan buhaton gyud ang iyang gimando.

“Pag-una namong kita, dili  gyud na magtingog. Naa koy pangutana, dili sad motubag. hangtod, nga ako gyud siya nga na-encourage sa pag-atubang og mga tawo ug kinahanglan hinay-hinay nga mawala ang iyang pagka-mauwawon, “ suma pa sa mentor ni Jashley nga si Danny.

Suma pa ni Danny  nga nalingaw siya sa mga  panghitabo nila didto sa Bulgaria gumikan kay aduna gyud sila’y mga on the spot nga  mugna aron nga magpabilin sa Pilipinas ang spotlight.

Mapasigarbuhon gyud si Danny sa katakus ug kaanyag ug sa kabuotan ni Jashley gumikan kay dili gyud ipalapos sa pikas dunggan ang iyang mga ipangtudlo.

““Sa iyang pagkamaulawon.. Na challenge gyud ko niya. Kay dili gyud siya mutingog. But iyaha diay i-input diri [hunahuna] ug diri [kasingkasing]”, pag-asoy ni Danny.

Dako gyud ang pasalamat ni Jashley ngadto kang Danny gumikan kay mao gyud kini ang miatiman kaniya sa usa ka semana nga dagan sa kompetisyon.

Alang kang Jashley nga todo gyud ang iyang paningkamot  nga makoronahan aron nga ma-proud ang iyang pamilya kaniya.

Gani, nakabati sab siya og pressure sa dihang nahibal-an na nga ang iyang mga kauban sa Princess Philippines 2018 nga sila si Kasley Malaika Libres ug Sarah Nicole Filtness, nakadaog isip  Teen Miss Universe First Runner-up ug Pre-Teen Miss Universe.

Pulong pa ni Jashley nga kanunay niya nga gihinumduman ang panultihon nga “As queens, we never lose. We either win or we learn.”

Wala gyud magpaulahi si Jashley gumikan kay gawas sa naangkong korona, naangkon sab niya ang Best in National Costume Award, ug ang Albena Resort Choice Award.

Gani, siya sab ang nakaangkon sa gold medal sa modeling nga usa sa mga pre-activity sa maong indigay.

Pagkakaron, wala pa’y plano si Jashley nga mosalmot dayon og laing indigay.

Dako gyud ang nausab kaniya sukad siya nisalmot og indigay.

“I’m comfortable talking to people. Sometimes, I answer in school. I don’t care anymore if they laugh at me,” matud pa niya.