Jodi ug Richard subling mag-uban?

CEBU, Philippines – Mitumaw karon ang hungihong nga  sila si Jodi Sta. Maria ug Richard Yap maoy  ihulip  nila ni  Kris Aquino ug Herbert Bautista isip mga bida sa pelikulang  All You Need Is Pag-Ibig. Kahinumduman nga miatras si Kris sa maong movie project. Misikat ang tandem nila ni Jodi ug Richard Yap gumikan sa seryeng Please Be Careful With My Heart.

Kylie gikapoy mag-inusara

Nagplano si  Kylie Padilla nga  iyang ibaligya ang  condominium unit niya sa  Ortigas Center, Pasig City gumikan kay gilaayan na siya nga mag-inusara sa balay. Gusto sa aktres nga makauban niya ang iyang  pamilya sa pagpuyo.

Dakong garbo

Gipadayag ni JC de Vera  nga wala  pa’y titulo ang umaabot niya nga pelikula kung diin makauban niya si Nora Aunor. Suma pa sa aktor nga dakong garbo alang kaniya nga makauban ang superstar sa usa ka proyekto. Dugang pa ni JC nga tulin kaayo ikatrabaho si Nora ug migiya gyud kini sa mga batan-ong artista.

Charice napungot sa hinawayon

Napungot ang singer nga si  Charice sa mga tawong nisaway  sa  tattoo sa iyang bukton. Suma pa sa singer nga wala’y makabuot sa gusto niya nga buhaton ug ang labing importante nga dili siya makahasol sa ubang tawo.

Mokiha sa direktor

Nakigtigom na sa iyang  legal counsel ang theater/movie actress nga si Dalin Sarmiento alang sa iyang planong pagpasaka og kaso sa  direktor nga si Joselito 'Jay' Altarejos gumikan kay gitinuod gyud siya og sumbag sa  tiyan aron mahatagan niya og hustisya ang usa ka eksena sa pelikulang  Death By Gokkun.  Suma pa ni Dalin nga wala’y katungod ang maong direktor nga pasakitan siya og maayo.

Jorross amahan na gyud

Nanganak na niadtong Sabado ang asawa ni Joross Gamboa nga si Katz . Lalaki  ang unang anak sa  magtiayon ug ginganlan nila kini og Jace Kyler. “Thank you God for giving my wife a safe and normal delivery.Thank you also for giving us a healthy cute baby boy!,” tipik sa Instagram post ni Jorross.

Chavit sa Happy Life

Nag-ulohan og Happy Life ang umaabot nga public service show ni kanhi Governor Chavit Singson sa GMA-7.  Motuyok-tuyok si Chavit sa nagkadaiyang dapit sa nasud ug motabang sa mga tawo nga duna’y mga suliran.

Kris mobayad multa

Mobayad sila si  Kris Aquino ug Bimby sa multa  sa Metro Manila Film Festival gumikan sa pag-atras nila sa  official entry sa  Star Cinema nga “All You Need Is Pag-ibig” . Suma pa ni Kris nga tag P500,000 matag usa ka tawo  ang multa. Dugang pa sa TV host nga kita niya sa  “Etiquette For Mistresses” maoy iyang  ibayad sa multa.

Musuporta kang Bongbong

Si Sen. Bongbong Marcos maoy gi-endorsar  nga vice presidentiable sa magtiayong Toni Gonzaga ug Paul Soriano. Mitambong ang duha sa political rally ni Bongbong niadtong Sabado sa Intramuros, Manila. Usa si Bongbong sa mga miluhod sa kasal nila ni Toni ug Paul.

Espesyal nga bisita ni Pokwang

Gikatakdang motikang dinhi sa Pilipinas  sulod karong tuiga ang  mga ginikanan sa American boyfriend ni Pokwang nga si Lee O’ Brian.

Suma pa nga gusto sa ginikanan ni Lee nga maila-ila nila sa personal ang komedyanteng aktres.

Nasayran nga nag-uros uros karong panahona ang lovelife ni Pokwang ug nisamot pa gyud kini sa dihang nilenggua si Lee nga sugdan na niini ang pag-proseso aron permanente na ang pagpuyo niini sa nasud.

Nalingaw si Lee sa iyang pag-istar sa Pilipinas gumikan kay gawas nga nakakaplag siya og hinigugma, nahatagan usab siya og acting project pinaagi sa sitcom sa TV5 nga Kano Luvs Pinay.