Ex-vice mayor sa narco-list itinumba!
NORTH COTABATO, Philippines — Patay sa pamamaril ang dating bise-alkalde ng Sultan Sabarongis, Maguindanao nang tambangan at pagbabarilin ng hindi pa nakikilalang suspek sa Purok Golden Duranta, Brgy. New Isabela, Tacurong City sa lalawigan ng Sultan Kudarat, Biyernes ng gabi.
Kinilala ang biktimang si Roger Lagawan Mamalo, 63-anyos, residente ng Purok Sampaguita ng nasabing barangay.
Sa inisyal na report ng Tacurong Police, pauwi na sana ang biktima sakay ng kanyang sasakyan nang harangin at pagbabarilin ng nag-iisang suspek gamit ang cal. 45 pistol dakong alas-8:20 ng gabi.
Mabilis na tumakas ang suspek sakay ng motorsiklo.
Nasa narco-list umano ng Philippine Drug Enforcement Agency ang dating bise-alkalde na naisugod pa sa pagamutan pero hindi na umabot pang buhay dahil sa tinamong apat na tama ng bala sa katawan.
Sa ngayon, blangko pa ang pulisya sa pamumuno ni P/Supt. Joefel Siason sa motibo ng pamamaslang at kung sino ang nasa likod nito.
- Latest
