Chase Tower Runs mihimo'g kasaysayan
Gikoronahan nga labing unang kampiyon sa Dayo 23 Streetball
CEBU, Philippines — Ang Chase Tower Runs basketball team sa Cebu misuwat og kasaysayan isip labing unang kampiyon sa Dayo 23 Streetball Invitational Tournament.
Ang CTR ni shipping magnate ug social media influencer Chase Cokaliong milupig sa Team HoopX sa Manila, 23-21, sa kulbahinam nilang race-to-23 finals aron birahon ang korona sa unang edisyon sa torneyo niadtong Dominggo, Mayo 19, didto sa Brgy. 830 covered court sa Pandacan, Manila.
Si Froilan Mangubat mipakita sa iyang katakos isip "3-Point King" sa Cebu Schools Athletic Foundation, Inc. (CESAFI) uban sa University of San Carlos (USC) Warriors human siya milansang og krusyal nga 2-pointer nga maoy naghatud sa CTR ngadto sa gihandum nilang kampiyonato. Gawas nga milangkat sa titulo, ang mga Sugbuanon mibulsa sab og P300,000 nga ganting salapi.
Gawas ni Mangubat, ang CTR ubos sa paggiya ni head coach Paul Joven gilangkoban sab sa mga hait nga collegiate standouts nga sila si Ice Hontiveros ug Jancork Cabahug. Silang tanan nalakip sa Dayo 23 Mythical Team.
"It was an honor to be one of the players who represented Cebu for Dayo 23. I’m grateful to boss Chase Cokaliong for his trust and support. All the teams were strong and we all tried our best in each game. It wasn’t an easy fight but we’re very happy that we won and became champions for Cebu . Bisaya represent!"matud pa ni Cabahug.
Anaa sab sa CTR team ang Sugbuanong basketball legend nga si Dondon Hontiveros, kanhi University of the Visayas (UV) Green Lancers All-Star center Jerome Napao, kanhi CESAFI Slam Dunk champion Miguel "The Cebuano Rocket" Gastador sa University of San Jose-Recoletos (USJ-R) Jaguars, Mac Racho (Southwestern University-Phinma Cobras), Paul Galinato (University of Cebu Webmasters), ug Dolan Adlawan (USC Warriors).
- Latest
