Teamwork sandata ng Crossovers

MANILA, Philippines —  May tatlong laro pa ang Chery Tiggo sa elimination round para sa tsansang ma­kapasok sa semifinals ng 2024 Premier Volleyball League (PVL) All-Filipino Confe­rence.

Tabla sa fourth place ang Crossovers at Petro Gazz Angels sa magkatulad nilang 6-2 kartada sa ila­lim ng Choco Mucho Flying Titans (8-1), PLDT High Speed Hitters (7-1) at nagdedepensang Creamline Cool Smashers (7-2).

Ang mga natitirang ka­la­ban ng Chery Tiggo ay ang PLDT, Akari (4-5) at si­bak nang Galeries Tower (3-6).

“Siyempre po back to trai­ning, lahat pagtatrabahuhan,” sabi ni open spiker Eya Laure sa Crossovers na sumasakay sa isang four-game winning streak.

“So itong mga nakikita ninyo, result na ito. Pero sa training din kami nagpu­pukpukan, doon namin ti­natama ‘yung mga mali namin, ‘yung mga pagku­ku­lang namin, para pagda­ting sa laro madali na lang, sabi nga ni coach Kungfu Reyes,” dagdag ng 25-an­yos na si Laure.

Huling naging biktima ng Chery Tiggo ay ang Cig­nal HD, 26-24, 25-20, 26-24, noong Huwebes.

Sa nasabing panalo ay bumanat si Laure ng 16 points mula sa 11 attacks, dalawang kill blocks  at tatlong service aces bukod pa sa 13 excellent receptions.

Hinirang si Laure bilang PVL Press Corps Player of the Week.

Tinalo ng produkto ng Uni­versity of Santo Tomas para sa weekly citation sina Alyssa Valdez ng Creamline, Royse Tubino ng Choco Mucho, Ivy Lac­sina ng Nxled, Kiesha Be­do­nia ng PLDT, Dindin Santiago-Manabat ng Akari at France Ronquillo ng Ga­leries.