Wembanyama No. 1 pick ng Spurs; Paul sa Warriors na

NEW YORK - Kagaya ng inaasahan, hinirang ng San Antonio Spurs si Victor Wembanyama bilang No. 1 overall pick sa 2023 NBA Draft kahapon dito sa Barclays Center.

Niyakap ng 7-foot-4 center mula sa France ang kanyang pamilya matapos kumpirmahin ng Spurs ang pagpili sa kanya.

“Just accomplishing something that I’ve been dreaming about my whole life,” sabi ni Wembanyama. “Hearing that sentence from Adam Silver, I’ve dreamed of it so much -- I’ve gotta cry.”

Ang 19-anyos na si Wembanyama ang ikatlong big man na piniling top overall selection ng San Antonio matapos sina David Robinson (1987) at Tim Duncan (1997).

Gumawa naman ng NBA history ang kambal na sina Amen Thompson (Houston) at Ausar Thompson (Detroit) matapos mapili bilang No. 4 at No. 5 picks, ayon sa pagkakasunod, bilang unang magkapatid na nakuha sa top 5.

Samantala, kinuha ng Golden State Warriors si veteran guard Chris Paul mula sa Washington Wizards kapalit ni Jordan Poole.

Bukod kay Poole ay ibibigay din ng Warriors sa Wizards si Ryan Rollins at dalawang future draft picks para makuha ang 12-time All-Star at five-team season assists leader na si Paul.