Fans bawal muna uli sa PBA
MANILA, Philippines — Bawal muna ulit ang live audience sa oras na magbalik-aksyon ang Philippine Basketball Association (PBA) Governors’ Cup sa unang linggo ng Pebrero.
Ito ang inihayag ng pamunuan ng liga kung saan muli itong maghihigpit sa patakaran upang masiguro na ligtas ang lahat sa coronavirus disease (COVID-19).
Bumababa na ang bilang ng mga tinatamaan ng COVID-19 sa National Capital Region (NCR) subalit nananatiling mataas ang bilang ng kaso sa buong bansa partikular na sa ibang mga probinsiya.
Kaya naman ayaw magpakampante ng PBA.
Ipatutupad ng liga ang home-venue-home set up kung saan muling idaraos ang mga laro sa isang closed door venue.
Aprubado na ng PBA ang pagsisimula ng scrimmages ng mga teams para sa nakatakdang resumption ng liga. Nakaabang na lamang ito sa magiging sagot ng Metro Manila Development Authority, Games and Amusement Board at mga local government units kung saan nakapaloob ang training venues ng 12 PBA teams.
“We’re now talking to them. That’s the reason why the MMDA will play a big role in our talks with the different LGUs,” ani Marcial.
Numero uno pa rin sa listahan ng PBA ang mga venues ng Ynares Sports Arena sa Pasig City, Smart Araneta Coliseum sa Quezon City at Mall of Asia Arena sa Pasay City para pagdausan ng mga laro.
Tututukan muna ng PBA na masimulan ang resumption ng Govenors’ Cup bago gumawa ng hakbang para naman pahintulutang makapanood ang mga fans.
Nakasalalay ang lahat sa magiging alert level status ng Metro Manila kung papayagan ang live audience.
- Latest
