Europe pocket tournament plano para sa Gilas Pilipinas

MANILA, Philippines — Hindi pa rin nawawala sa radar ng Samahang Basketbol ng Pilipinas (SBP) ang pagkakataong maipadala ang Gilas Pilipinas sa Europe para sumalang sa ilang pocket tournaments doon.

Bahagi ito ng paghahanda ng Gilas Pilipinas para sa FIBA Asia Cup na aarangkada sa susunod na buwan sa Jakarta, Indonesia.

Target dayuhin ng Gilas Pilipinas ang Serbia, Germany, France, Estonia at Argentina ngunit nakabase pa ito sa travel restrictions ng mga bansa.

“If we can go play in pocket tournaments (in those countries), they would be better preparation as long as they were consistently available and we could have the budget to go to those. That would be preferable,” ani Gilas Pilipinas head coach Tab Baldwin sa programang Power and Play.

Sakaling hindi ito matutuloy, may Plan B ang SBP kung saan malaki ang posibilidad na maglaro ito bilang guest team sa PBA Season 46 Philippine Cup na nakatakdang simulan sa Hulyo 16 sa Ynares Sports Center sa Pasig City.

“The PBA is certainly a potential possibility for us,” ani Baldwin.

Hindi naman isinasara ng PBA ang pintuan nito na maglaro bilang guest team ang Gilas Pilipinas upang mabigyan ito ng sapat na exposure bago sumabak sa FIBA Asia Cup.

Wala pang desisyon ang SBP kung itutuloy ito.

Sakaling matuloy, maglalaro ng anim hanggang walong laro ang Gilas Pilipinas sa Philippine Cup.

“There’s no plan in absolute effect, but when MVP (Manny V. Pangilinan) speaks, we make sure we absorb exactly what he says. And the essence of what the boss is saying is we need games and he’s absolutely right,” ani Baldwin.