Nietes-Palicte rematch ikasa—WBO
MANILA, Philippines — Ipinag-utos ng World Boxing Organization (WBO) na ikasa ang rematch sa pagitan nina reigning WBO junior bantamweight champion Donnie ‘Ahas’ Nietes at mandatory challenger Aston Palicte.
Ipinaalam ng WBO ang desisyon nito sa ALA Promotions ni Nietes at Roy Jones Jr. (RJJ) Boxing Promotions ni Palicte kung saan binigyan ito ng taning na 15 araw para ayusin ang Nietes-Palicte fight.
Ikinatuwa naman ng kampo ni Palicte ang desisyon ng WBO.
Kung hindi maaayos ang Nietes-Palicte rematch sa loob ng itinakdang panahon ng WBO (o hanggang sa Pebrero 19), iuutos ng WBO ang ‘purse bid’ na nakasaad sa WBO Regulations of World Championship Contests.
Nagkakahalaga ng $100,000 ang minimum bid.
Nauna nang isiniwalat ng ALA Promotions na mas nanaisin nitong makalaban ni Nietes ang banyagang karibal gaya nina Sriksaket Sor Rungvisai ng Thailand o Juan Francisco Estrada ng Mexico at undefeated World Boxing Association (WBA) super flyweight champion Khalid Yafai ng Great Britain.
Nakuha ni Nietes ang WBO belt nang manalo ito kay Kazuto Ioka ng Japan sa Wynn Palace Cotai Arena sa Macau noong Disyembre 31.
- Latest