Ancajas puntirya rin ang Thai titlist

MANILA, Philippines — Bukod kay Japanese Naoya Inoue, pupuntiryahin din ni Filipino world super flyweight champion Jerwin Ancajas si Thai titlist Srisaket Sor Rungvingasi para sa kanyang susunod na laban sa 2018.

“Sa akin gusto ko silang habulin sina Sor Rungvingasi at Inoue, pero susunod kami sa sasabihin ng promoter sir,” sabi ni Ancajas sa panayam ng ABS-CBN News.

Noong Linggo ay umiskor si Ancajas ng isang sixth-round stoppage win laban kay Irish challenger Jamie Conlan para sa matagumpay na pagtatanggol sa kanyang International Boxing Federation crown sa SSE Arena sa Berlfast, Ireland.

Itinaas ni Ancajas ang kanyang 28-1-1 win-loss-draw ring record tampok ang 19 knockouts laban kay Conlan (19-1-0, 11 KOs).

Sinabi ni MP Promotions matchmaker Sean Gibbons na plano nilang ipakilala ang tubong Panabo, Davao del Norte sa mga boxing fans sa United States.

At sinuman kina Inoue, kampeon sa World Boxing Organization at Rungvingasi, ang hari sa World Boxing Council, ang lalabanan ni Ancajas para sa isang unification fight sa Pebrero ng 2018 sa US.

Si Ancajas ang ikatlong Filipino world champion sa kasalukuyan bukod kina IBF light flyweight ruler Milan Melindo at IBF flyweight king Donnie 'Ahas' Nietes.