Boxers, managers pinagsusumite ni Mitra ng medical requirements

MANILA, Philippines - Hinikayat ni Games and Amusements Board (GAB) Chairman Abraham Kahlil B. Mitra ang mga boxers at managers na magsumite ng kinakailangang medical requirements.

Ito ay matapos pu­mirma sina Mitra at Department of Health (DOH) Secretary Paulyn Rosell-Ubial sa isang kasunduan na magbibigay ng libreng medical check-ups, kasama ang CT scans, sa mga boksingero.

“There is no reason anymore for a boxer not to have a medical check-up including CT scan with this breakthrough agreement,” sabi ni Mitra.

Nilagdaan ng GAB at DOH ang Memorandum of Agreement kamakailan sa DOH Main Office, Sta. Cruz, Manila.

“Pumunta lang kayo sa mga ospital na tutukuyin ng DOH at makukuha ninyo ang libreng check-up at CT scan kung kinakailangan. Malaking katipiran ito sa mga boxers. Ginagarantiya nito na fit to fight ang boxer at hindi blacklisted,” dagdag pa ng GAB chief.

Ayon kay Dr. Radentor Viernes ng GAB, kasama sa nasabing kasunduan ang lahat ng government hospitals sa buong bansa.

Ang mga boxers ay kinakailangang magsumite ng Chest X-Ray (PA View), 12 leads ECG, Drug Test (DOH-IDTOMIS), Hepatitis B Antigen (Elisa Method) at CT Scan.

Ang lahat ng professional athletes ay dapat ding kumuha ng lisensya mula sa GAB, kasama dito ang medical requirements.

Kinumpirma ng mga GAB doctors ang pagsusumite ng 27 boxers ng tunay na CT scan results, habang nadiskubre namang peke ang ibinigay ng 155.