Romero kay Peping: Mag-resign ka na
MANILA, Philippines - Pinagbibitiw ng ilang mambabatas ang bagong talagang Philippine Olympic Committee (POC) President na si Jose “Peping” Cojuangco Jr. sa kanyang puwesto upang bigyang-daan ang mga bagong sports leaders na may mas magandang programa para sa mga atleta.
Nanguna sa panawagan si Rep. Mikee Romero ng party-list group na 1-Pacman kung saan sinabi nito na lumubog ang Pilipinas sa mundo ng palakasan sa ilalim ng 12-taong panunungkulan ni Cojuangco.
“For the sake of Philippine sports, I call on Mr. Cojuangco to be a true sportsman and statesman and step down. There are younger and more competent leaders who can take over,” wika ni Romero sa Usaping Balita forum sa Serye Café’ sa Quezon City.
Nagtapos lamang sa ikaanim na puwesto ang Pilipinas sa 2015 Southeast Asian Games na ginanap sa Singapore noong nakaraang taon matapos makalikom ng 29 ginto, 36 pilak at 66 tanso - malayo sa 112 gintong nakamit ng bansa noong 2005 edisyon na ginanap sa Manila.
“We are now No. 6 among 11 countries in ASEAN (Association of Southeast Asian Nations). We are behind Singapore, which has only three million people compared to 110 million Filipinos. Cambodia and Laos are fast catching up with us. We have to save Philippine sports,” sambit pa ni Romero.
Tunay na napag-iiwanan na ang Pilipinas sa ASEAN region matapos masungkit ng Singapore ang unang gintong medalya nito sa Olympic Games mula kay swimmer Joseph Schooling na nagtala pa ng bagong rekord.
Masuwerte ang Pilipinas dahil nariyan si Hidilyn Diaz na nagsalba sa kampanya ng pambansang koponan bunsod ng kanyang pilak na medalya sa women’s weightlifting event.
“12 years is enough. If he does not give way to younger leaders, he will have served for 16 years. Maybe, he will consider retiring at 86 by then,” ani Romero.
Nakatakdang simulan aniya ng House committee on youth and sports development ang imbestigasyon hinggil sa iregularidad sa pamamalakad ng POC sa ilalim ni Cojuangco partikular na ang mga pondong nakuha nito sa Philippine Sports Commission na walang liquidation documents.
“We will start with their failure to account for P125 million received from the PSC (Philippine Sports Commission). We will try to find out where this huge amount was used or misused. It’s not a political organization, but there is excessive politics in it. If you are not with the incumbent leaders, you are ostracized. We have to depoliticize it,” dagdag ni Romero. (CCo)
- Latest
