San Miguel iiwas malagay sa delikado
MANILA, Philippines – Lalapit ang Barangay Ginebra sa inaasam na puwesto sa finals sa muling pakikipagtuos sa nagdedepensang San Miguel Beer sa Game 2 ng PBA Governos’ Cup best-of-five semifinal series sa Araneta Coliseum.
Lalarga ang pukpukan ng Gin Kings at Beermen sa alas-7 ng gabi.
Nahablot ng Ginebra ang 1-0 kalamangan sa serye matapos kubrahin ang 115-108 come-from-behind win sa Game 1 noong Lunes.
Buhay na buhay ang never-say-die attitude ng Gin Kings dahil hindi ito nawalan ng pag-asa sa kabila ng 46-57 pagkakalugmok sa first half.
Isang malakas na 33-19 bomba ang pinakawalan ng Ginebra sa third quarter upang makuha ang momento tungo sa pagkopo ng matamis na panalo.
Umariba sa naturang panalo si import Justin Brownlee na nagpasabog ng 39 puntos, 16 rebounds, dalawang steals at isang block ngunit malakas na suporta rin ang nanggagaling kina Japeth Aguilar, Sol Mercado at Joe Devance para makatulong sa tropa.
Kumana si Aguilar ng 22 habang may pinagsamang 31 puntos sina Mercado at Devance.
Gayunpaman, sinabi ni Ginebra coach Tim Cone na wala pang dapat ipagdiwang ang Gin Kings dahil nagsisimula pa lamang ang serye.
“It was a good win for us. But it obviously didn’t win the series, Game 2 is a big deal,” wika ni Cone.
Kabisado ni Cone ang mantra ng Beermen kaya’t isang solidong plano ang inihahanda nito para sa Gin Kings upang mapigilan ang anumang atakeng ilulunsad ng kanilang karibal.
“Their (Beermen) first five is solid,” wika ni Cone.
Walang iba kundi ang makaresbak ang tanging nasa isip ng Beermen matapos ang masaklap na kabiguan sa series opener.
Sa katunayan, tatlong Beermen ang nagtala ng 20-plus score sa pangunguna ni import Elijah Millsap na may 29 puntos ngunit kapos pa rin ito matapos ang masamang laro sa second half.
Kumana rin si reigning MVP June Mar Fajardo ng 25 puntos at Alex Cabagnot ng 20.
“Coach Tim did a good job to stop our big men from scoring inside. Kaya kailangan naming sundin ang game plan namin,” sambit ni Beermen mentor Leo Austria.
Desidido rin si Fajardo na makabawi upang makabalik sa kontensiyon ang kanilang koponan.
“Mahirap mabaon sa series kaya kailangan namin manalo sa Game 2,” ani naman ng 6-foot-10 center.
Samantala, kasalukuyang naglalaro ang Meralco Bolts at TNT Katropa sa Game 1 ng kanilang sariling best-of-five semifinal series, habang sinusulat ito.
- Latest
