Presyo ng gasolina tataas, diesel bababa
MANILA, Philippines — Inaasahang may malaking pagtaas sa presyo ng gasolina sa susunod na linggo, habang may rollback naman sa presyo ng diesel.
Sa fuel forecast ng Unioil Petroleum Philippines, nabatid na ang presyo kada litro ng diesel ay maaaring bumaba ng P2.00 hanggang P2.20.
Ang presyo naman ng gasolina ay maaaring tumaas ng mula P3.80 hanggang P4.00 kada litro.
Ganito rin ang pagtaya ng isa pang oil industry source, na nagsabing maaaring matapyasan ang presyo ng diesel ng mula P2.40 hanggang P2.70 kada litro. Ang presyo naman ng gasolina ay maaaring tumaas ng mula P4.00 hanggang P4.30 kada litro.
Karaniwan nang iniaanunsiyo ng mga oil companies ang oil price adjustments tuwing Lunes at ipatutupad naman ito sa susunod na araw.
Epektibo noong Martes, Mayo 17, nagpatupad ang mga kompanya ng langis ng tapyas presyo sa domestic oil prices.
Nabatid na P0.40 kada litro ang ibinawas sa presyo ng gasolina habang P3.00 hanggang P3.10 naman kada litro sa presyo ng diesel.
Batay sa datos mula sa oil price monitoring ng Department of Energy (DOE), nabatid na ang presyo ng gasolina ay nasa P69.55 hanggang P81.95 kada litro na, habang ang presyo naman ng diesel ay nasa pagitan na ng P73.35 hanggang P80.61 kada litro.
- Latest
