Koreano na nagturok ng droga sa Pinay, timbog
MANILA, Philippines — Timbog ang isang Korean national nang mahulihan ito ng droga at nadiskubre ring tinurukan nito ng droga ang kasamang Pinay, kahapon ng umaga sa Pasay City.
Kinilala ang suspect na si Seoukwon Choi, 32, nanunuluyan sa Positano Azure Condominium, Bicutan, Taguig City.
Kinilala naman ang biktima na si Jennifer Bravoy Guinalang, 31, nakatira sa Alpha Grandview Condominium, Malate, Maynila, na nilalapatan ng lunas sa San Juan De Dios Hospital matapos itong turukan ng droga sa katawan kung kaya ito naging wild at nagwala.
Ayon sa ulat, alas-5:45 kahapon ng umaga nang madakip ang suspect ng mga kagawad ng Pasay City Police sa isang ospital sa Roxas Boulevard Service Road ng nabanggit na siyudad.
Bago ang insidente, nag-check-in ang suspect at kasama nito ang biktimang Pinay sa isang hotel sa Pasay. Doon umano tinurukan ng dayuhan ng droga ang Pinay kaya ito nagtatakbong walang saplot na nakatalukbong lang ng kumot.
Namataan ito ng isang taxi driver at tinulungang dalhin sa pagamutan at nang mahimasmasan ang babae, sinasabing may itinurok sa kanyang katawan ang suspect.
Kasunod nito humabol ang dayuhan sa hospital pero tumanggi ito na ipa-inspection sa security guard ang kanyang dalang bag dahilan upang tumawag ito ng pulis.
Agad namang nagresponde ang mga pulis at nadiskubre ang dala nitong shabu at injection sa loob ng kanyang sasakyan.
- Latest