10 timbog sa human trafficking, illegal recruitment
MANILA, Philippines - Nadakip ng mga tauhan ng National Bureau of Investigation (NBI) ang sampung katao na sangkot sa human trafficking at illegal recruitment sa dalawang magkahiwalay na pagsalakay sa Taguig at Pasay City.
Unang nadakip ang mga suspek na sina Danica Bucaling, Mary Ann Buan at Jayvy Badeo sa Taguig City, habang ang dalawang biktima naman na nasagip ay inilagay na sa kalinga ng Department of Social Welfare and Development (DSWD) dahil kapwa menor de edad.
Ayon kay Atty. Janet Francisco, ang pinuno ng NBI Anti-Human Trafficking Division ang mga biktima ay anak at pamangkin ng isa sa suspek na ginagamit niya sa operasyon sa cybersex.
Ang mga biktima nasa edad 15 at 17-anyos ay ginagamit sa online prostitution kapalit ng $50 hanggang $60 kada 30 minutong online show na ang mga viewer o kostumer ay mga Amerikano.
Ginawa ng NBI ang operation nang makatanggap ng impormasyon mula sa Immigrations and Customs Enforcement ng US Homeland Security Investigations.
Ipaghaharap ng kasong paglabag sa Republic Act 7610 o Special Protection of Children Against Abuse, Exploitation and Discrimination Act at RA 10175 o Cybercrime Prevention Act of 2013 ang tatlong salarin.
Samantala, sa pagsalakay naman na ginawa noong Marso 22 sa Pasay City, naaresto naman sina Marie Alvarez, Mercy Galedo, Crisanto Diroy, Joel Gallezo, Kristine Fernandez, Claudia Arnente at Ramona Castro matapos ireklamo nang mabigo na mapaalis ang kanilang mga ni-recruit aplikante papuntang Japan.
Nalaman sa mga biktima na may dalawang taon na silang naghihintay sa pangako ng mga suspek na pawang empleyado ng Kairus Human Resources pero hanggang sa kasalukuyan ay hindi pa rin sila napapaalis.
Nahaharap naman sa kasong paglabag sa R.A. 8042 (Syndicated and Large Scale Illegal Recruitment) at Estafa, ang pitong naarestong suspek.
- Latest
