Solon sa DFA, DMW: Mga Pilipino sa ME, tiyaking ligtas sa giyera ng Iran, Israel
MANILA, Philippines — Nanawagan si Sen. Francis “Tol” Tolentino sa Department of Foreign Affairs (DFA) at Department of Migrant Workers (DMW) na protektahan at tiyaking ligtas ang mga Pilipino sa Middle East habang sinasalakay ng Iran ang Israel, gamit ang mga drone at missiles.
Ayon sa DFA, humigit-kumulang 2,221,448 overseas Filipinos ang naninirahan sa 16 na bansa sa Middle East. Karamihan sa kanila ay nasa Saudi Arabia (865,121), United Arab Emirates (648,929), Kuwait (241,999), at Qatar (241,109).
Ang iba pang mga bansa sa Middle Eastern na may malaking bilang ng mga overseas Filipino ay Bahrain (55,790), Oman (52,760), Jordan (40,538), Lebanon (33,424), at Israel (29,473).
Ang naninirahan bilang permanenteng residente, pansamantalang residente, at undocumented/irregular migrants, mula sa mahigit 100 hanggang mahigit 5,000 overseas Filipinos, ay naitala sa Egypt, Libya, Iraq, Iran, Syria, Palestine, at Yemen.
Sinabi ni Tolentino na ang overseas Filipinos na naninirahan ngayon sa Israel ay nangangailangan agad ng aksyon ng gobyerno upang matiyak ang kanilang kaligtasan at maiuwi sila kung kinakailangan upang maiwasan ang pagkawala ng buhay sakaling lumala pa ang sitwasyon.
Buong pagtitiwala sa DFA at DMW, umaasa siya na ang dalawang ahensyang ito ay may nakahandang contingency measures para protektahan ang mga overseas Filipino sa pinakamasamang sitwasyon, halimbawa kapag naipit sa gitna ng armadong labanan.
- Latest