NFA chief, 138 pa sinuspinde sa bagsak presyong bigas
MANILA, Philippines — Pinatawan ng Office of the Ombudsman ng anim na buwang preventive suspension ang nasa 139 opisyal ng National Food Administration dahil sa bentahan ng rice buffer stocks.
Kasama sa mga suspendido sina NFA Administrator Roderico Bioco, Asst. Admin John Robert Hermano at iba pang regional managers at warehouse supervisors.
Dahil dito sinabi ni Agriculture Secretary Francscio Tiu Laurel na pansamantala niyang pangangasiwaan ang NFA at tatayong officer in charge sa ahensya habang umiiral ang suspension order at gumugulong ang imbestigasyon kung saan kasama sa target na silipin ang mga transaksyon mula noong 2019.
Kailangan pa rin na tuluy-tuloy ang pagbibigay ng serbisyo sa publiko.
“I have been in contact with the Office of the Ombudsman ever since this controversy erupted. I also created a special panel of internal investigators to determine culpability and see how we can prevent it from happening again in the future,” ani Laurel.
Nabatid na nag-ugat sa imbestigasyon sa umano’y pagbebenta ng NFA ng libu-libong tonelada ng bigas na buffer stock sa ilang traders sa paluging presyo.
Hindi naman kasama sa suspension order ang accuser na si Assistant Administrator for Marketing Operations Lemuel Pagayunan.
Giit din ng kalihim, hindi niya palalampasin ang anumang uri ng korapsyon sa ahensya. Layon nilang maisiwalat ang katotohanan at mapanagot ang mga nasa likod ng iregularidad.
Una nang sinabi ni Laurel na bumuo siya ng panel na nagsagawa ng imbestigasyon hinggil sa bentahan ng bigas sa halagang P25 kada kilo at P23 kada kilo naman ng palay nang hindi dumaan sa bidding.
Kinakailangan din na matiyak na ligtas ang mga bigas dahil ito ang pangunahing pangangailangan at pagkain ng nasa 10 milyong Pilipino.
- Latest
