Imee: Senate president dapat galing sa UniTeam
MANILA, Philippines — Dapat na manggaling sa senatorial slate ng UniTeam ang susunod na Senate President.
Ito ang paniniwala ni Sen. Imee Marcos dahil na rin sa rami ng problema ng bansa kaya dapat ay mabilis at malakas ang dating ng mga batas na kinakailangan.
Nilinaw naman ni Marcos na hindi niya target ang Senate presidency o anumang mataas na posisyon sa 19th Congress.
Ang pahayag ng Senadora ay ginawa matapos na ibunyag kamakailan ni Sen. Sonny Angara na nagpahayag ng interes si Marcos at Senator-elect Loren Legarda na maging senate president pro-tempore na ikalawang pinakamataas na posisyon sa upper chamber.
Sa tanong naman na kung pabor siya sa term-sharing sa Senate presidency ay sinagot ito ni Marcos na “lahat ng kandidato sa anumang eleksyon ay kinakailangan bukas ang isipan, sakripisyo at kompromiso sa ibang lebel ng negosasyon dahil masagwa umano na magsisimula ang bagong administrasyon na nag-aaway-away.
Sa ngayon, kabilang sa mga nagnanais makuha ang pinakamataas na posisyon sa Senado ay sina Senate Majority Leader Juan Miguel Zubiri, Senator Cynthia Villar, Senator Sherwin Gatchalian, at Senator-elect Francis Escudero.
Suportado naman ni Imee ang Senate presidency bid ni Villar.
Bukod sa Senate president pro tempore ay sinabi ni Angara na target din ni Imee ang chairmanship sa Senate Finance Committee, na kasalukuyan niyang pinamumunuan.
- Latest
