‘Most wanted’ todas sa shootout
COTABATO CITY, Philippines — Bulagta ang isang “most wanted person” matapos manlaban sa mga otoridad na maghahain ng warrant of arrest laban sa kanya kaugnay ng patung-patong na kasong pagpatay sa Purok Lagundongan, Brgy. Kalanganan Dos, Cotabato City kahapon.
Kinilala ang napaslang na si Alip Kitab, may asawa, at residente ng nasabing lugar. Sa report, isisilbi sana ng mga elemento ng 1404th Company-Regional Mobile Force Battalion 14 sa pangunguna ni P/Major Arturo Rivera Jr. ang arrest warrant laban kay Kitab pasado alas-4:00 ng hapon nang paputukan nito ang mga pulis sa halip na sumuko sanhi ng shootout. Tinamaan ng bala sa ulo at ibang parte ng katawan ang suspek sanhi ng agaran nitong kamatayan.
Nakuha sa lugar ang cal. 45 pistol ng suspek at mga basyo ng bala. Si Kitab ay kabilang umano sa apat na pumaslang sa meter reader ng Colight na si Randolf Ferolin Cabañog noong Mayo 10, 2014 sa Datu Kadir Datumanong St., Mother Barangay Bagua ng lungsod.
- Latest
