Duterte magpapatayo ng evacuation centers
Para ‘di ginagamit ang mga eskuwelahan
MANILA, Philippines — Nais ni Pangulong Duterte na magtayo ang gobyerno ng mga evacuation centers na magagamit tuwing may kalamidad upang hindi maputol ang pag-aaral ng mga estudyante na nawawalan ng classrooms dahil ginagawang pansamantalang tirahan ng mga biktima ng bagyo.
Sa command conference ng Pangulo kasama ang mga miyembro ng kanyang Gabinete bago dumating ang bagyong Ompong, ipinaalala ni Education Secretary Leonor Briones ang mungkahi na limitahan ang paggamit ng mga school buildings bilang mga evacuation centers.
Sumang-ayon ang Pangulo kay Briones at sinabing panahon na nga upang magtayo ng mga evacuation centers na gawa sa semento para magamit ng mga mamamayan at hindi maistorbo ang pag-aaral ng mga bata.
Inatasan ng Pangulo si National Disaster Risk Reduction and Management Council (NDRRMC) Executive Director Undersecretary Ricardo Jalad na magtayo ng mas maraming evacuation centers na parang gym at may mga comfort rooms para sa mga babae at lalaki.
“It’s about time that General Jalad thinks of this. Yun talagang mga frontliners na lugar: Leyte, Samar, itong Cagayan, Isabela, makagawa man lang tayo parang gym puro semento. Oo, parang gym lang with so many perhaps 10 CRs for women and 10 na --- ihiwalay mo lang babae lalaki,” sabi ng Pangulo.
Ipinahiwatig din ng Pangulo na dapat ay matatag ang mga itatayong evacuations centers na bukod sa sementado ay gagamitan ng metal iron.
Target ng Pangulo na makapagtayo ng 14 evacuation sa mga unang buwan ng 2019 kung maihahabol sa budget.
Sabi ng Pangulo hindi dapat maapektuhan ng mga kalamidad o sunog ang pag-aaral ng mga estudyante.
Samantala, bibisitahin ni Pangulong Duterte ang mga lugar na sinalanta ng bagyong Ompong sa sandaling maayos na ang panahon at puwede ng lumipad ang helicopter nito sa mga apektadong lugar.
- Latest
