PhilHealth binigo ang 2M seniors
MANILA, Philippines — Binigo umano ng PhilHealth ang aabot sa 2 milyong senior citizens sa buong bansa na mabigyan ng sapat na benepisyong pangkalusugan dahil umano sa kakulangan ng pondo.
Ayon kay Senior Citizen Partylist Rep. Milagros Aquino-Magsaysay, hindi natupad ng PhilHealth ang mandato nito na pagkalooban ng health care coverage alinsunod sa batas ang mga senior citizens.
Anya, sa ilalim ng Republic Act 10645 o ang Mandatory PhilHealth Coverage for Senior Citizens Act, dapat bigyan ng sapat na tulong pangkalusugan ang mga senior citizens o edad 60 anyos pataas at mai-enroll sa national health insurance agency.
Bahagi rin ng nakokolekta sa RA 10351 Sin Tax Law ay kailangang pondohan ang nasabing coverage ng benepisyo para sa mga senior citizens sa bansa.
Nabatid na ang kabuuang ‘premium allocation’ para sa RA 10645 sa ilalim ng National Expenditure Program na ipinanukala ng Department of Health para sa PhilHealth ay aabot sa P6.7 M para sa P2.8 M senior citizens sa ilalim ng programa.
Noong 2015 ang kabuuang implementasyon ng PhilHealth Primary Care Benefit package kabilang ang senior citizens enrollees ay ipinagpaliban sa hindi maipaliwanag na kadahilanan. Idinagdag pa ng mambabatas na hanggang ngayon ang mga matatandang enrollees sa National Health Insurance Agency ay hindi tumatanggap ng Primary Care Benefits.
- Latest