Bagyong Lawin nagbabantang maging mala-Yolanda
MANILA, Philippines - Patuloy na pinag- iingat ng PagAsa ang publiko sa papasok na bagong bagyo na tatawaging ‘Lawin’ dahil mas malakas pa ito kaysa sa nagdaang bagyong Karen at posibleng maging sinlakas ng nagdaang super typhoon na Yolanda na kumitil ng maraming buhay at nagwasak ng mga ari-arian sa bansa.
Alas- 5 ng hapon kahapon, si Lawin ay namataan ng PagAsa sa layong 1,245 kilometro ng silangan ng Legazpi City, Albay at nasa labas pa ng Philippine Area of Responsibilty.
Kahapon ng hapon pumasok na sa PAR ang bagyong Lawin na nagtataglay ng hangin na umaabot sa 175 kilometro bawat oras malapit sa gitna at may pagbugso ng hangin na umaabot sa 215 kilometro bawat oras.
Ito ay kumikilos pakanluran hilagang kanluran sa bilis na 24 kilometro bawat oras.
Ngayong Martes ng hapon, si Lawin ay inaasahang nasa layong 975 kilometro ng silangan ng Baler, Aurora at sa Miyerkules ng hapon ay inaasahang nasa layong 400 kilometro ng silangan ng Casiguran, Aurora.
Sa Huwebes ng hapon, si Lawin ay inaasahang nasa bisinidad ng Laoag, Ilocos Norte at sa Biyernes ay nasa layong 510 kilometro ng kanluran hilagang kanluran ng Basco, Batanes o nasa labas na ng ating bansa.
Samantala, tuluyan nang nakalabas ng PAR ang bagyong Karen kahapon pero may mga pag-uulan pa rin na naranasan sa Luzon dahil sa epekto ng naturang bagyo.
- Latest
