Pinas Ebola-free pa rin
MANILA, Philippines - Tiniyak ng Department of Health (DOH) na nananatiling Ebola-free ang bansa, pero hinihikayat pa rin ng ahensiya ang mga Filipino na nakararanas ng lagnat, sakit ng ulo, panghihina, joint at muscle pains at pangangati ng lalamunan na kusang magpatingin at kumuha ng clearance mula sa mga local health authorities ng kanilang pinanggalingang bansa bago payagang makapasok ng Pilipinas upang maiwasan ang pagpasok ng Ebola virus.
Umaabot na sa 800 ang namatay sa mahigit 1,200 tinamaan ng sakit.
Ayon kay DOH spokesman Dr. Lyndon Lee Suy, maituturing nang nakakaalarma ang halos 50-75 percent fatality rate para sa kahit anong sakit, kaya hindi maaaring ipagkibit-balikat ang Ebola na wala pang lunas.
Dahil dito, nakikipagtulungan na ang DOH sa iba pang ahensya ng pamahalaan upang matiyak na walang makakalusot na virus carrier sa ating bansa.
Samantala, binabantayan na ng Bureau of Quarantine ang mga point of entry sa bansa sa banta ng Ebola.
Katulad ng pagbabantay sa Middle East Respiratory Syndrome-Corona Virus (MERS-CoV) ang ginagawang pag-monitor ng DOH sa Ebola virus.
Bukod sa pagpapadaan sa mga termal scanner, ibinalik na rin anya ang mga form kung saan itatala ng isang biyahero ang bansa o mga bansang pinuntahan at nadaanan sa paglalakbay.
Isang inter-agency meeting ang isinagawa ng Office of Migrant Workers ng Department of Foreign Affairs (DFA) noong Hunyo 30 upang mapag-usapan ang kalagayan ng mga OFWs sa Guinea, Sierra Leone at Liberia na dumaranas ngayon ng Ebola outbreak.
Kasalukuyang nakikipag-ugnayan ang mga OFWs sa kani-kanilang mga recruitment agencies upang malaman kung madaling mahawaan ang mga ito ng virus.
Matatandaang inilagay na sa heightened alert ang bansa dahil sa banta ng Ebola virus na pumatay na ng mahigit 600 sa West Africa.
- Latest
