Menor de edad nga misulod og balay pasakaan og kaso

CEBU, Philippines — Mag-atubang og kasong robbery ang anyos 17 anyos nga lalaki nga nadakpan sa akto sa polis nga maoy tag-iya sa panimalay nga iyang gilungkab sa Sitio Kalatchuchi sa Barangay Pajac, Siyudad sa Lapu-Lapu.

Si Police Lieutenant   Christian Torres, tigpamaba sa Lapu-Lapu City Police Office (LCPO) miingon nga ang biktima nga si Police Corporal Chuck Amores Booc nga nagpuyo sa maong dapit ang mitugyan ngadto sa ilang buhatan sa dinakpan nga 17 anyos nga giingong nakasulod sa ilang panimalay pinaagi sa pagtangtang sa jalousie sa bentana dapit sa comfort room.

Matud pa ni Torres nga nakuha nga mga ebidensiya nga gikawat mao ang tulo ka mahalon nga cellphone ug P30,000 nga kuwarta sa biktima.

Ang kauban niiini nga hingkod na ang panuigon nga giila lamang sa pangalan nga Junard Ganda kinsa giingong kusog nga nakadagan palayo pasakaan usab og kaso.

Si Torres miingon nga natulog sa lawak sa ilang panimalay si Corporal Booc dihang nahigmata tungod sa kagilkil sa pagtangtang sa jalousie sa bintana ug sa pagsusi niini naabtan ang minor de edad nga wala gilayon makalihok ug iyang nagunitan. Ang minor de edad nga suspek kasamtangang itugyan sa Department of Social Welfare and Development (DSWD) 7 aron pagsuta kon nakasabot na ba kini sa salaod nga iyang nahimo.   MEL BANAT NEWS