E-bike driver, itinumba sa karinderya
MANILA, Philippines — Dead on the spot ang isang lalaki na kalalaya lang sa bilangguan kamakailan matapos pagbabarilin ng hindi pa nakikilalang suspek habang naghahapunan sa karinderya, kamakalawa ng gabi sa Parañaque City.
Nasawi dahil sa tama ng bala sa ulo ang biktimang si Anthony Aguilar, 22, e-bike driver, residente ng Opeña St., Barangay Baclaran.
Mabilis na tumakas ang salarin na inilarawang nakasuot ng itim na jacket at helmet.
Sa ulat kay Southern Police District (SPD) Director P/Brig. General Mark Pespes, bago nangyari ang krimen, alas-7:45 ng gabi sa E. Rodriguez St., Brgy. Baclaran ay kumakain ang biktima nang lapitan ng suspek sa likuran at walang sabi-sabing pinuputukan sa likod ng ulo.
Sa impormasyon, ang biktima ay wala pang isang taon na nakalaya mula sa pagkakakulong sa mga kasong robbery at iligal na droga.
Kilala naman ng may-ari ng karinderya ang biktima na wala naman umanong alam na kaalitan at nagagawang magbayad ng boundary sa ipinapasadang e-bike.
- Latest