LTFRB: Contact details ng pasahero kailangang itala ng PUVs
MANILA, Philippines — Kapag nabalik na ang operasyon sa ilalim ng general community quarantine (GCQ) ay kakailanganing magkaroon ng manifesto ang lahat ng public utility vehicles (PUVs).
Ayon kay Land Transportation Franchising and Regulatory Board (LTFRB) Chairman Martin Delgra III, lahat ng PUV sa ilalim ng sakop ng LTFRB--mga bus, jeep, tricycle, taxi, at TNVS na ilan lamang sa mga ito ay kakailanganing magkaroon ng rekord ng kanilang mga pasahero para sa contact tracing habang nananatili ang banta ng coronavirus disease (COVID-19).
“Kailangang may manifesto ng pasahero kasama ‘yung mga pangalan, contact number on the part of the bus operator…Hindi lang sa bus ‘yan, kundi sa lahat ng public transport system---jeep, taxi, lahat,” ani Delgra sa Laging Handa public briefing nitong Lunes.
Habang kailangang magkaroon ng manifesto ang mga operator, umapela rin ang LTFRB sa publiko na magtago ng sarili nilang record tungkol sa detalye ng PUV na sasakyan nila.
“Minimungkahi natin at pinu-push natin ‘yung booking online for both TNVS and taxi, kasi meron silang sistema na tinatawag nating mobile apps,” wika ni Delgra.
“That would take care of contact tracing kasi meron na ‘yung tinatawag natin na travel history na meron dun sa mobile app,” dagdag pa ni Delgra.
- Latest
