Hotel sa Bacolod nasunog: 6 patay
MANILA, Philippines — Patay ang anim na katao kabilang ang isang paslit habang apat naman ang sugatan matapos lamunin ng nangangalit na apoy ang isang pension house sa Bacolod City, Negros Occidental nitong Martes ng madaling araw.
Sa report ng Bacolod City Fire Marshal, dakong alas-4:40 ng madaling araw nang mangyari ang sunog sa Java Pension House na matatagpuan sa Gonzaga St., Brgy. 12, ng lungsod.
Ayon sa imbestigasyon, nagsimula ang apoy sa isang motorsiklo na nasusunog sa hallway sa unang palapag ng pension house na mabilis na kumalat sa mga kuwarto rito.
Natagpuang patay sa loob ng naturang pension house ang anim na katao kabilang ang isang batang menor-de-edad, dalawang babae at tatlong lalaki na pawang na-suffocate nang ma-trap sa loob na nasusunog na gusali.
Nasagip naman ang 15 katao kabilang dito ang apat na sugatan na idinaan sa mga bintana ng mga nagrespondeng tauhan ng Bureau of Fire Protection at iba pang mga volunteer groups.
Dakong alas-6:00 ng umaga nang ideklarang fire out ang sunog sa 5 storey na pension house.
- Latest