Pamilya, 5 tinodas ng mga adik
Ang limang miyembro ng pamilya sa San Jose del Monte City, Bulacan na pinatay ng adik. Boy Santos
2 ginang ginahasa pa...
MANILA, Philippines - Limang miyembro ng isang pamilya ang pinagsasaksak hanggang sa mapatay ng mga lalaki na bangag sa droga na kung saan ginahasa pa ang dalawang ginang naganap kahapon sa Brgy. Sto. Cristo, San Jose del Monte City, Bulacan.
Kinilala ang mga nasawing sina Auring Dizon, 53; Estrella Dizon, 35; at mga anak nitong sina Donnie Carlos Dizon, 11; Ella Dizon, 7 at Dexter Carlos Dizon Jr., 1-anyos.Ang mag-inang Auring at Estrella ay kapwa hubo’t hubad.
Batay sa ulat, dakong alas-9:45 ng umaga nang madiskubre ang pag-masaker sa mga biktima sa loob ng inuupahang apartment na matatagpuan sa Block 1, Lot 8, North Ridge, Brgy. Sto. Cristo.
Ang krimen ay nadiskubre matapos na umuwi sa kanilang apartment ang padre pamilya na si Dexter Carlos Dizon Sr., isang security guard na nagtaka umano kung bakit tumatawag siya sa may gate ay wala ni isang nagbubukas sa kaniya gayong tanghali na at matindi na ang sikat ng araw.
Sa pahayag ng padre de pamilya walang nagbukas sa kaniya kaya’t pinilit niya na makapasok sa loob ng bahay at dito na tumambad sa kaniya ang bangkay ng kaniyang pamilya kung saan kapwa walang saplot ang kaniyang ina at misis na si Estrella na hinihinalang ginahasa pa ng mga salarin.
Sa kasalukuyan, blangko pa rin ang mga otoridad sa pagkakakilanlan sa mga suspek na hinihinalang mga bangag sa droga dahilan sa tindi ng krimen na ginawa na maging ang 1 anyos na sanggol na anak ng ginang ay nagawa pang paslangin.
Wala namang nakitang palatandaan ang Scene of the Crime Operatives (SOCO) team na nagresponde sa lugar nang puwersahang pagpasok sa bahay ng pamilya.
- Latest
